Helegitea jarri zuten pasa den urtean Hernani, Usurbil eta Oiartzungo Udalek, 2017ko San Marko Mankomunitateko aurrekontuen aurka, eta EAEko Auzitegi Nagusiak orain eman du epaia: 2014, 2015 eta 2016ko aurrekontuak bezala, baliogabetu egin ditu 2017koak ere.
Hala adierazi zuten Udalak Mankomunitatean dituen ordezkariek; Mattin Aldaia eta Koro Etxeberria zinegotziek. «Lau urtez jarraian epaitegiak aurrekontuak baliogabetzea ez da makala, eta horrek zerbait adierazten du. Mankomunitateko kudeaketa txarra dela, eta txarraz gain, bidegabea ere badela».
Europako Zuzentarauak kontuan
Aldaia eta Etxeberriak azaldu bezala, «legealdi honetan mankomunitateko batzarretan behin eta berriz eskatu» dute «zerga-sistema bidezko bat ezartzea, zerga-sistema tresna garrantzitsu bat delako hondakinen kudeaketa egokia bultzatzeko eta gaizki egiten dutenak zigortzeko. San Marko Mankomunitatea gobernatzen duten alderdiek, EAJ eta PSEk, adliz, entzungor egin digute».
Hain zuzen, orain arte erabilitako irizpideek Euroapko Zuzentarauen «kontra» egin dutela salatu zuten, «oinarrizko bi printzipio urratu» dituztelako. Bat, «ondo egiten dutenak saritu eta gaizki egiten dutenak zigortzea». Bestea, «erabiltzen ez ditugun zerbitzuengatik ez dugula ordaindu behar. Hondakinen bilketa Udalaren esku dugun herriok ez ditugu erabiltzen Mankomunitatearen zerbitzuak, eta hala ere, denok ordaindu behar izaten genituen». Horretan, 2017ko aurrekontuetan «Mankomunitateak aldatzeko saiakera» egin izana azpimarratu zuten, baina horren ordez, «garbiguneen kostua zerbitzua eskaintzen dugun udalerriongan ezarri» izana salatu zuten. «Hernanik, Oiartzunek eta Donostiak ditugu Garbiguneak, baina Mankomunitate osoari ematen diote zerbitzua».
Hau guztia horrela, «hondakinen kudeaketaz hitz egiteko garaia» dela azpimarratu zuten, eta udalerri guztiei egin zieten gonbita, «hondakinen inguruko hausnarketa egiteko; Europako legedia bete behar dugu».