Astelehenero bezala, asanblada egin zuten atzo Hernaniko pentsiodunek, orain arteko aldarrikapenak egiten jarraitzeko; besteak beste, eskatzen dute «gutxienez KPI errealaren araberako pentsioen eguneratze automatikoa eta legez bermatua; 1.080 euroko gutxieneko pentsioa; soldata eta pentsioetan genero ezberdintasunarekin amaitzeko neurriak ezartzea; edota 40 urtez kotizatu duenarentzako, zigorrik gabeko aurrejubilazioa».?
Baina, horrez gain, udaleko ordezkari politiko guztiak gonbidatu zituzten, egiten dituzten eskarien aurrean zein jarrera duten jakiteko. EH Bildutik Luis Intxauspe alkatea eta Xabier Lertxundi alkategaia eta egungo Zerbitzu Sozialetako lehendakaria agertu ziren, eta Orain Hernanitik, Jaione Aristregi bozeramailea.
Pentsiodunek PSE eta EAJko ordezkaririk ez gerturatu izana nabarmendu zuten, eta EAJk helarazitako gutuna irakurri zuten; «gai hauen inguruko erabakiak hartzen diren guneetan, Eusko Jaurlaritzan eta gobernu zentralean, urteak lanean» daramazkitela azaltzen zuen gutunean EAJk.
Lertxundik eta Aristregik babesa adierazi zieten, eta haien eskarien alde hartzen ari diren neurrien berri ere eman zieten.
Larunbatean, Donostiara
Babesa jasota ere, eskatzen dutena lortu arte mobilizatzen jarraitzeko asmoa dute pentsiodunek; larunbatean, 17:00etan Donostiako Bulebarrean jarri dute hitzordua.