Abiadura Haundiko Trenari dagozkion lanak aurrera dijoaz Hernani eta Astigarragan. Hala adierazi du Euskal Trenbide Sarea erakunde publikoak azkeneko aurrera pausoen berri ematerakoan. Batetik, Hernani-Astigarraga tartearen 2. fasea lizitatu du; eta bestetik, Ergobiako goiko igarobidearen lanak esleitu ditu.
47,3 milioiko aurrekontua
Hernani-Astigarraga tartearen 2. fasearen proiektuak UIC (zabalera europearra) enborreko plataformaren eraikuntza jasotzen du, zabalera iberiarra duen trenbideen artean eraikiko dena, eta bi sistemen arteko konexioetarako aukera emango duena, behin kota aldeak gaindituta. Dena den, proiektu honek plataforma besterik ez du eraikiko, «ondoren gauzatuko den superegitura proiektuan gauzatuko dira UIC trenbidea eta bi sistemen arteko konexioak».
Konexioa beharrezkoa izango dela aipatu du ETSk: «Donostian dagoen Atotxako geltokira heltzeko, baita egungo linearen bitartez Frantziako mugara egon daitekeen luzapen posiblerako ere».
Proiektuak 41 hilabeteko egikaritze-epea dauka, eta 47,3 milioi euroko aurrekontua.
Maiatzaren 3an, itxiera
Bestalde, Hernani-Astigarraga tartearen lanekin batera, Ergobiako goiko igarobidea ere esleitu du ETSk. Construcciones Balzola S.Ak eraikiko du eta maiatzaren hasieran hasiko dira lanak. Hori horrela, egungo igarobidea maiatzaren 3an itxiko da; ordutik, behin behineko igarobidea erabili ahal izango da.
Igarobide berria egiteko lanek 4,5 milioiko aurrekontua daukate eta 11 hilabeteko lanak aurreikusi dituzte.