Atseden hartuko dute asteburu honetan, Euskal Ligako neskek; baina atseden gutxiko partiduak izango dituzte mutilek, Ohorezko Erregional mailan, eta jubenilen Liga Nazionalean. Etxetik kanpo ariko dira bi taldeak, eta oso kontrario gogorrak izango dituzte aurrean.
Eibarko Unbe zelaian ariko dira Ohorezko Erregionalak, gaur arratsaldean, 16:00etan hasita; eta Eibar liderraren kontra jokatuko dute, etxean partidu bakarra galdu duena. Txuri-berdeek, sailkapenean ahal duten ondoen geratzea bakarrik daukate jokoan, igoerakoak bezain urruti baitauzkate jaitsierakoak. Eta egoera horretan, ezustekoa bilatuko dute gaur, joan den asteburuko porrotari buelta emateko.
Jubenilek, berriz, liderrari ez, baina bigarren sailkatuari egingo diote bisita: Real Sociedad B taldeari, Zubietan, arratsaldeko 16:30etan. Azkenaurreko partidua dute hernaniarrek, eta sailkapeneko postu erosoetan kokatuta, ondo bukatu nahi dute denboraldia.