Hernaniko Musika Bandak eta Taupa perkusio-taldeak kontzertua eskainiko dute gaur, 19:00etan udaletxeko arkupetan. Donostiako Francisco Escudero Kontserbatorio Profesionaleko zenbait perkusio-ikaslek, 13-19 urte bitarteko gazteek, osatzen dute Taupa, eta horiekin batera, zuzendari lanetan, Jorge Pacheco Garcia arituko da, Hernaniko Musika Bandako zuzendaria.
Talentu haundiko mutilak dira guztiak. Elkarrekin, martxoan ospatu berri den Euskadiko Musikari Gazteen lehiaketan parte hartu zuten eta irabazle izan dira Ganbera-Musika sailean eta perkusioko bi mailatan. Honez gain, Euskadiko eskolarteko txapelketan lehenengo postuan geratu dira azken bi urteotan, musika-tresna guztietako ikasleekin lehian. Gainera, bakarkakoan, talde honetako kide bat, Espainiako bost onenen artean geratu da.
Erritmoa, kontzertu honetako ezaugarri nagusia
Kontzertu honetako protagonista erritmoa izango da, zalantzarik gabe. Erritmo bizia eta aldakorra. Hala ere, egitarauan melodia eta armonia zoragarriak entzun ahal izango dituzte bertaratzen direnek. Melodia brasildarrak, irlandarrak, edota marrazki bizidunen, big-banden eta musika-klasikoaren arteko esperimentua, John Williams eta Deep Purple-en doinu famatuenekin batera.
Beraz, musika-estilo guztiz desberdinak entzun ahal izango dira kontzertu berean: klasikoa, herrikoia, modernoa, etnikoa, jazz-a eta rock progresiboa. Egitaraua osatu dute ikus-entzuleak dantzan jartzeko moduko sei abestirekin: Olympic Fanfare and Theme, Two Tribes, Stormbreak (Taupa taldea bakarlari izango duena), Las Playas de Río, Hunting Wabbits eta Deep Purple Medley.