Laster bukatuko dira, Galtzaur auzoa eraberritzeko obrak. Astigarragako Udalak jakinarazi du, azkeneko lanak bakarrik falta direla; eta besteak beste, auzoko argiztapena hobetuko dutela, datozen asteotan.
Izan ere, dagoeneko bukatu dituzte, Galtzaur kalearen asfaltoa berritzeko lanak. Pitzadurak eta kalteak konpondu dituzte, «oso hondatuta» baitzegoen errepidea. Eta horrekin batera, berritu dituzte anbulatorioaren atzeko aparkalekuak ere. Mokolo plazako haur parkearen lurra ere aldatu dute, «itxura erakargarriagoa emateko», Udalak azaldu duenez.
Horiei gehitu behar zaie, duela hilabete batzuk berritu eta estali zutela anbulatorioaren ondoko haur parkea.
Lan horiekin, Udalak «guztiz zaharberritu» nahi izan du auzoa; Astigarragan «zaharkituen» zegoen auzoetako bat.
Berritu dituzte Galtzaur kaleko asfaltoa, anbulatorio ondoko aparkalekuak eta Mokolo plazako haurrentzako parkearen lurra.
Manixene bideko lanak, datozen egunetan
Bestalde, Udalak azaldu du, bideen konponketekin jarraituko duela, eta datozen egunetan hasiko dituela lanak, Manixeneko bidea konpontzeko. Floreaga bidekoak, berriz, dagoeneko martxan daude.