Dublinen jaio, han euskera ikasi, eta bere bizitzaren bidaia abiatu zuen Anton Abbadiak, Hendaiara iritsi arte; bertan altxatu zuen bere gaztelua. Duela bi mende izan zen hori, eta orain, Abbadiaren bizitzari buruzko ikuskizuna osatu du laukote batek: Txomin Heguy antzezleak, Xabi Zeberio eta Mixel Ducau musikariek, eta Alaia Philips Ducau abeslariak. Anton Abbadia: Dublinetik Hendaiara du izena.
Astigarragako kultur etxean eskainiko dute gaur, iluntzeko 20:00etan hasita.
Heguy bera ariko da Anton Abbadiaren paperean, eta eszenatokira ekarriko ditu, esploratzaile, geografo, astronomo eta kulturgile izan zenaren baloreak. Musikariek, gidatuko dute antzezlanaren soinu banda: Zeberiok joko ditu nyckelharpa, biolina eta kalimba, eta Ducauk gitarra eta klarinetea. Musikaren bitartez, hamaika tokitara eramango dute entzulea: Irlandara, Brasilera, Parisera, Etiopiara, Zuberoara...
Eta azkenik, Alaia Philips Ducauk, Abbadiaren bizitzaren pasarteak irudikatuko ditu, kantuekin.
Sarrerak, ordubete lehenago
Ikuskizunerako sarrerak, aurreko egunetan izan dira salgai; eta gaur, saioa baino ordubete lehenago erosi ahal izango dira, 19:00etatik aurrera, kultur etxean bertan: helduek 6 euro, eta haurrek 3 euro.