«Auzotarren arteko elkartasuna eta auzolana bultzatzea» helburu, 2012an berreskuratu zuen Atsolorraren usadioa Ereñotzuko Auzo Udalak, eta ordutik, urtero egiten diete Atsolorra edo harrera aurreko urtean jaiotako haurrei.
Lau haurrei ongietorria, aurten
Aurten, hain zuzen, iaz jaiotako lau haurrei egingo zaie ongietorria. Horrez gain, Auzo Udaletik nabarmendu dute «auzoarekin harremana duten gurasoak ere gonbidatuta daudela beraien seme-alaben Atsolorra ospatzera etortzera».
Horretarako, eskatu dute parte hartu nahi duenak aurretik abisatzeko: 943 551 000 (bulegoko orduetan) edo 699 480 007 telefonoan.
Ruben Rosasen dokumentalaren aurrerapena, egun horretan
Txalaparta hotsekin emango diote hasiera ekitaldiari, arratsaldeko 17:30etan, Ereñotzuko Kultur etxean. Idoia Arriola eta Kristiñe Solanok lagunduko diote ttan-ttakunei, eta bertaratutakoekin batera, abesti ezagunak abestuko dituzte. Hala egingo zaie ongietorria iaz jaiotako haurrei eta beren familiei.
Ondoren, Atsolorraren inguruan Ruben Rosas zinegileak egindako dokumentalaren aurrerapena ikusi ahal izango da.
Bukatzeko, merienda ederra egingo dute, gurasoek eta auzotarrek prestatutako jakiez gain, ohiko gisadua eta arroz esnea ez dira faltako!