Astigarragako PSE-EEk bere hautagaitzaren berri eman du; Mikel Duran izango da alkategai maiatzaren 26an. Bigarrenez izango da sozialisten hautagaitzaren buru, lau urtez bozeramaile izan ostean.
«Harro eta ilusioz», Duran
Berriro ere alkategai izateagatik «harro eta ilusioz» dagoela adierazi du Duranek, eta hitz eman du «erantzukizuna eta sen ona» izango dituela identitate-ikur. Izan ere, uste du «PSE-EEren proiektua onena dela Astigarragarentzat eta bertako herritarrentzat».
Egindako lana, goraipatuta
Era berean, bukatzen ari den legegintzaldi honen balorazioa ere egin du; PSE-EEk lanerako eta adostasunerako izan duen gaitasuna nabarmendu du: «Astigarragako PSE-EEk beti eman dio lehentasuna udalerriaren eta astigartarren ongizateari, kolore politikoen gainetik».
«Erabakigarriak izan gara Astigarragaren gobernagarritasunean», PSE-EEren hautagaiaren hitzetan. Eta lan horretan aipatu ditu atez atekoa kentzea eta bosgarren edukiontzia ezartzea edota aurrekontu-itunak; baita Kultur Etxea eta ibai-parkea gauzatzean ere.
Interes politikoen gainetik, udalerria jartzeak ahalbidetu dio «legegintzaldi honetan akordioetara iristea Anibar partzelan DBHa jartzeko mozioan; auzoetako eskaeren mozioan; haurtzaindegi berria kokatzean edota Herri Eskolaren haundipenean».
Zerbitzu-sarea zabaltzea
Etorkizunaz ere aritu da Mikel Duran. Bere ustez, datorren legegintzaldian «behin betiko bultzatu» beharko dira aurrekoan gauzatu ez diren proiektuak, tartean, «Herri Eskola haunditzea eta DBH ezartzea».
Astigarragako zerbitzu-sarea zabaltzea ere aipatu du: «udalerri gazte bat da, bertako populazioa nabarmen handitu da, eta horrek behartu egiten gaitu zerbitzu publikoaren inguruan orain dagoen eskaerari erantzungo dioten proiektuak planteatu eta gauzatzera». Horiek «oso kontutan» izango dituztela diote.
Azkeneko helburua enpleguan ezarri dute; plan ekonomikoa aplikatzea aipatu du.