Garaipenik ez zuen lortu Hernanik Santanderren, baina bi puntu garrantzitsu batu zituen San Romaneko zelaian. 36-31 galdu zuten trikoloreek eta emaitza horrekin orain 35 puntu dituzte.
Heineken Ligan mantentzeko borrokan dauden bere aurkariek ere puntu berdinak lortu zituzten. Gernikak etxean berdindu zuen Santboianaren kontra, hamahiruna, eta La Vilak, Hernanik lorturiko emaitza oso antzekoarekin galdu zuen Ordizian, 35-28, eta hauek ere bonuseko bi puntu lortu zituzten.
Beraz, sailkapen nagusia hiru talde hauen artean berdin geratzen da. Puntu bakarrera daude Villajoyosakoak eta zortzira gernikarrak. Hori bai, partidu bat gutxiago falta da amaitzeko eta hori ez da txarra Hernanirentzat. Gainera, Cisnerosek puntu bakarra batu zuen eta orain Hernanirekin berdinduta daude puntutan, partidu bat gutxiagorekin.
Gora-beherak partiduan
San Romanen jokaturiko partiduak momentu desberdinak izan zituen. Lehendabiziko 25 minutuetan Hernani izan zen jaun eta jabe eta 7-19 aurreratu ziren. Atsedenaldira iristerako berdindu zuten partidua etxekoek 19na.
Bigarren zatian hobe irten zen Independiente eta partidua ia erabakita utzi zuten 36-19. Hori bai, Hernanik ez zuen amorerik eman eta azken hamar minutuetan bi entsegu lortu eta bi puntuak lortu zituen markagailua 36-31 utziz. Azken jokaldi bat ere egon zen, baina emaitza ez zen mugitu.