Heineken Liga azken txanpan dago murgilduta eta partidu guztiak dira hil ala bizikoak. Hernani jeitsiera ekiditeko borrokan dago murgilduta eta gaur, 12:00etan, Santanderren jokatuko du Independienteren kontra. Salbazioa Kantabriako hiriburutik pasatzen dela esan daiteke eta Hernanik ez du hori lortzeko aukera galdu nahi.
Garaipenaren lau edo bost puntuak eskuratuz gero aurrera pausu ikaragarria izango litzateke helburu nagusia lortzeko bidean.
Sailkapena estu-estu
Hernanik, hiru partiduren faltan, 33 puntu ditu; La Vilak 32 eta Bizkaia Gernikak 25, bizkaitarrak partidu bat gutxiagorekin. Cisneros, bederatzigarren dago 34 punturekin eta hauek ere partidu bat gehiagoren faltan daude. Estu-estu dago sailkapena.
Santanderren irabaztea ez da ezinezkoa, ikusita bertako taldearen bolada. 2019an ez dute partidurik irabazi eta berdinketa bakarra lortu dute azken zazpi partiduetan. Hala ere irabaztea zaila izango da, bolada txar horri buelta eman eta salbazioa ziurtatu nahi baitute.
Hernaniko zaleak 08:00etan irtengo dira autobusez eta jokalariei ez zaie animorik faltako San Roman zelai berezian.
Ordu berean La Vilak Ordizian jokatuko du eta Gernikak etxean, Urbietan, hartuko du Santboiana. Hernaniren partidua ikusteko hemen dago aukera.