Urtebete egin du Ergobi Gastronomi-Kultur Elkarteak, eta ospatzeko, Euskal Jaia egingo da bihar, egun osoan zehar, Ergobiako Plazan.
Elkarteko kide Oscar Bereziartuaren esanetan, helburua da «auzoan giro ona sortzea», eta ahal dela, festa urteroko ohitura bihurtzea nahi dute. «Ea festa hau urteroko Ergobiako Euskal Jaia bihurtzen dugun».
Gaztetxo eta helduentzako egitaraua, egun osoan
Lehengo urteko martxoan sortu zuten Ergobi Gastronomi-Kultur Elkartea, auzoa haunditzen ari dela-eta, bertako bizilagunak elkartu eta auzoa girotzeko asmoz. Helburu bera du biharko prestatu duten egitarauak ere; festa giroan, haur, gazte eta helduak elkartzea.
Bihar goizeko 11:00etan hasiko da festa giroa nabaritzen. Ordu horretatik aurrera trikitilariak ibiliko dira auzoan, eta txorixo egosi pintxoak izango dira aukeran. Era berean, egun osoan zehar ariko da ETO DJ musikarekin giroa jartzen, eta Bikain eta Beizama tabernak irekita egongo dira, zerbait jan edo edan nahi duenarentzat.
Ekitaldiei dagokienez, goizeko 11:30etan sukaldaritza tailerrean hartu ahal izango da parte Hur Astarbek gidatuta: bakailaoa saltsa berdean eta oilaskoa sagardo erara prestatuko dira, eta 14:00ak aldera dastatu ahal izango dira. Tartean, 13:00ean, Sagardo Aparduna dastatu ahal izango da, baita ere, ByHur-en eskutik.
Bazkalondorenean, arratsaldeko 15:30ak aldera, haurrei zuzendutako ipuin kontaketa izango da, eta 16:30etan, erakustaldia egingo du Emarri taldeak. Nahi duenak probatzeko aukera ere izango du.
Eguna borobiltzeko, herri-kirolen erakustaldia egingo da, 18:00etan hasita.
ERGOBIA - EUSKAL JAIA
MARTXOAK 31
11:00, txorixo egosi pintxoak.
11:30, bakailaoa saltsa berdean eta oilaskoa sagardo erara prestatzen ikasteko tailerra, Hur Astarbe sukaldariarekin.
13:00, Sagardo Apardunaren dastaketa ByHur-en eskutik.
14:00, goizean prestatutako bakailaoa eta oilaskoa dastatzeko aukera.
15:30, ipuin kontalaria txikientzat, Ergobiako Plazan.
16:30, Ergobiako Plazan erakustaldia Emarri taldearen eskutik. Ate irekiak egingo dira.
18:00, herri-kirolak.
*Goizeko 11:00etatik bazkalordura
arte trikitilariak ibiliko dira jotzen. *Egunean zehar, ETO DJ ariko da giroa alaitzen.
*Bikain eta Beizama tabernak irekita egongo dira.