Makina bat ekintza izango dira Kontrakantxa gaztetxean, asteburu honetan. Eta bi zitarekin egingo diote bidea gaur, biharko Bulkada Egunari.
Hasteko, jantoki sozialaren bazkaria izango da, eguerdiko 13:00etatik 15:00etara, nahi duten guztientzat irekia, gaztetxeak eta Langileon Babes Sareak antolatuta. Eta gauean, Jam Sessionak jarriko du musika, 22:30etan hasita. Mikrofono irekiko saioa ere izango da ondoren, kantatzera animatzen direnentzat.
Mahai ingurua, poteo musikatua eta bazkaria, Bulkada Egunean
Bihar izango dira ekintza gehiago. Izan ere, Bulkada Eguna ospatuko dute gaztetxean, goizean eta eguerdian. Mahai ingurua egingo dute aurrena, 11:00etan, Hernaniko Gazte Antolakundeko militante ohien esperientziak ezagutzeko. Poteo musikatua egingo dute gero, Garinen, eguerdiko 13:00etan; eta herri bazkaria azkenik, 14:30etan gaztetxean. Bazkarira apuntatzeko, Garinen bertan dago zerrenda.
Bi kontzertu, bihar gauean
Eta bi egunetako programa borobiltzeko, musika izango da bihar gauean ere. Bi talderen kontzertuak antolatu dituzte, 22:00etan hasita, Kontrakantxa gaztetxean: Egurra Ta Kitto talde azpeitiarra aurrena, eta Hara! ondarrutarra, gero.