Hainbat berritasunekin dator, Berria Txapelketaren 16garren edizioa. Larunbatean aurkeztu zuten, Astigarragako Petritegi sagardotegian, hirugarrenez izango baita babesle. Datorren asteburuan hasita, pelota elkarte onenak ariko dira lehian, eta horien artean izango dira Hernani eta Mundarro, hutsik egin gabe. Astigartarrek, datorren igandean egingo dute debuta, final hamaseirenetan, San Miguelen kontra. Eta fase berean sartuko dira hernaniarrak, apirilaren 14an, Danok Lagunak taldearen kontra.
Aurrera eginez gero, Erreka izango du kontrario Mundarrok, maiatzaren 5ean; eta Lapke Hernanik, maiatzaren 19an. Guztira, 31 jaialdi jokatuko dira, igandero bina, Hernanin eta Andoainen. Eta finala ere, Hernanin jokatuko da, ekainaren 22an, San Joan jaietako egitarauaren barruan.
Bartzelonako talde bat, aurreneko aldiz
24 pelota elkarte ariko dira lehian, eta nobedade nagusia, Bartzelonako Nafarren Etxea elkartea izango da: «haurrekin lan haundia egiten ari dira pelota sustatzeko. Ilusioz gainezka daude txapelketan aritzeko, eta guretzat ohorea da haiek jasotzea», azaldu zuen Andoni Alvarez antolatzaileak. Oiarperen kontra jokatuko dute haiek, apirilaren 28an, Aste Santuko asteburua aprobetxatuz, bidaia errazteko.
Araudian ere izango da nobedaderik aurten. Izan ere, ia beti erabakiko dira kanporaketak, azkeneko partiduan: bi partidu irabazten dituen taldeak egingo du aurrera; baina talde batek irabazten baditu aurreneko bi partiduak, aurrera egingo du tanto gehien lortzen dituenak, hiru partiduetakoak batuta. Ohi bezala, kadeteak ariko dira aurreneko partiduan, jubenilak gero, eta nagusiak azkenik.
Emakumeen artean ere, txapelketa txikiago bat
Eta azkeneko berritasuna da emakumeen partehartzea. Izan ere, aurreratu dute txapelketa txikiago bat antolatu nahi dutela: bi finalerdi eta finala.
Oraindik zehaztu gabe daude bikoteak, baina azaldu dute, ideia dela Gipuzkoa, Nafarroa, Bizkaia eta Arabatik bikote bana gonbidatzea: «etorkizunera begira, nahi genuke pelota elkarte bakoitzak emakume bat plazaratzea; baina horretarako, lanean jarraitu behar dugu».