Datorren astean izango da antzerki zikloa Biterin, apirilaren 2tik 4ra; asteartetik ostegunera, hain justu. Baina antzezlanak ikusteko, gaur bertan jarriko dituzte sarrerak salgai: erdia goizean (09:00-13:00), eta beste erdia arratsaldean (16:00-20:00), Biterin. Antzezlan bakoitzerako, 7,5 euro dira sarrera.
Ghero izango da, antzezlan horietan aurrenekoa, asteartean eskainiko duena Tartean Teatroak. 3000 urtean kokatzen da, euskera desagertzeko zorian dagoela. Kondairen kondaira bat da Ghero, bederatzi istoriorekin, euskeraren biziraupen harrigarriari buruz.
Asteazkenean, berriz, Espacio disponible antzezlana eskainiko du Perigallo Teatro konpainiak, gaztelaniaz. Helduaroko bikote baten bizitza kontatzen duen komedia da, eta omendu nahi ditu maitasuna, eta gizarteak alferrikakotzat dituen gai eta jardueren berezko erabilgarritasuna.
Despedida ero bat, bukatzeko
Eta ostegunean, Erlauntza antzezlana izango da, Vaiven konpainiaren eskutik. Komedia mikatza da, non txikitako lagun koadrila bat, asteburu pasa joango den landetxe batera, haietako baten despedida ospatzera. Asteburu eroa, are gehiago erotuko da: trapu zaharrak, esan gabeko gauzak, alkohola, droga... eta erlauntz bat.
Arratsaldeko 20:00etan hasiko dira, hiru saioak.