Datorren astean egingo du geldialdia Laburbirak, Hernanin, Dobera Euskara Elkartearen eskutik. Ostegunean izango da, arratsaldeko 18:30etan hasita, Sandiusterrin.
Bederatzi film labur eskainiko dituzte, denak euskeraz, «kalitatezkoak eta dibertigarriak, euskerazko film laburren zaleei merezi duten gozatua emateko», aurreratu dute Laburbiratik. Ordubeteko saioa izango da, eta sarreraren truke, borondatea bakarrik eskatuko dute.
Egile gehienak, emakumeak
Laburbirak nabarmendu du, aurtengo filmen egile gehienak, emakumeak direla; zehazki, zazpi dira emakumeek egindakoak, eta zortzigarren bat, gizon eta emakume banarena. Hauek dira filmen izenburuak eta egileak: Begi ninien koreografia (Arrate Fernandez), Shell Phone (Miren Mujika), Zapatak (Irati Murua), Ama (Josu Martinez), June (Arantza Ibarra), Hotzean garbitu (Maddi Barrenetxea eta Marta Teijeira), Ilunpean (Iker Maguregi eta Andrea Martinez), Erroak (Ane Zuazubiskar), eta Handiak eta txikiak (Laida Ruiz).
Horiei buruzko informazio gehiago, www.kameratoia.eus webgunean dago ikusgai.