«Zorionez edo zoritxarrez, gu eta afizioa ohituta gaude, azkenera arte zalantza horretan ibiltzera», onartu du Beñat Iradik, Hernaniko kapitainak. Lau partidu falta direnean, mailari eusteko lehian bete-betean dago sartuta talde trikolorea, eta gogor borrokatu beharko dute, datorren urtean ere Ohorezko Mailan egoteko. Horretarako aurreneko lehia, gaur izango dute, etxean. Alcobendas talde madrildarra hartuko dute Landaren, eguerdiko 12:00etan.
Sailkapenean 10garren, eta La Vila eta Gernikarekin bi eta sei punturen aldearekin, garaipenen bat lortu beharra dauka Hernanik, ezinbestean. Asmo horrekin aritu dira lanean, azkeneko hilabetean, partidurik izan ez dela aprobetxatuz: «taldea elkartu eta pilak jarri ditugu. Azkeneko lau partiduetan, taldeak guztiz bat egitea izango da giltza», dio Iradik.
Lau partidu zail, bukatzeko
Partidu guztiak izan ohi badira zailak, bereziki gogorrak dira Hernanik izango dituen kontrarioak, azkeneko lau hauetan: Alcobendas eta Ordizia izango ditu bisitan Landaren, eta Independiente eta El Salvadorren zelaietan aritu beharko du. Horregatik, edozein aukera dauka aprobetxatu beharra, eta garaipena, gaur bertan lortzea espero dute. Horretara ohituta daudenez, jokalariek eta zaleek behintzat, dena emango dute, hala izan dadin.