Agerraldia egin zuen atzo Udal Gobernu Taldeak, azken Plenoan EAJk aurkeztutako mozioaren harira (ETAk eta haren inguruak eragindako ekintza biolentoak eragindako sufrimendua aitortzeko mozioa) eta ondoren oposizioak komunikabideetan (martxoaren 8ko Kronikan) esandakoari erantzuteko.
Luis Intxauspe alkateak nabarmendu zuen «bizikidetzaren inguruan lanean urteak» daramazkitela «alderdi guztiek, eta baita EH Bildu alderdi politikoak ere»; «ez da EH Bildu izan adostasuna puskatu duena, ez da adostasunik egon».
Publiko, adostasunak bakarrik
EH Bilduren esanetan, Bizikidetza Mahaian «adostasunetara iristean publiko egin dira» erabakiak: 2015eko Memoriaren Egunean Ave Marian harria jarri eta ekitaldia egin izana edota Aranzadiri Hernaniko gertaerak eta memoria jasotzea eskatu izana, adibidez. «Baina desadostasunak gehiago dira, eta ez dira publiko egiten. Horiek lantzea da bizikidetzaren ardatza. Nazioarteko gatazketan adituek diote adostea dela bizikidetzaren oinarria».
Hori horrela, gezurtatu egin du EAJren mozioa Plenora eramatea adostutako zerbait izan zenik eta testuak lau alderdien ekarpenak jasotzen zituenik. «2017an EAJk aurkeztu zuen mozioa Bizikidetza Mahaian, eta EH Bilduk ondoren beste bat, esaten zuena memoria integral eta kolektibo bat behar genuela. Ondoren EAJk beste bat aurkeztu zuen gure testutik zati batzuk gehituta, eta guk beste bat gero. 2017tik landu da mozio hori, baina ez da adostasunik egon».
«Arduragabekeria politikoaz jardutea eta gaiaren erabilera politikoa egitea» egotzi dio oposizioari Gobernu Taldeak.
«Sufrimenduak mailakatu gabe», 416 biktimak errekonozitzearen alde
Aranzadik Hernaniko memoria jasotzeko egindako lanaren aurkezpenean esan bezala, «biktima guztientzat erreparazioa adostea da gure erronka»,?Udal Gobernu Taldearen arabera. «Guztiei errespetua, dolumina eta babesa erakutsi nahi genieke. Hori adostu genuen lau alderdiek, eta ez EAJren mozioak dioena. Beraz, ez da EH Bildu izan adostasuna puskatu duena, ez da adostasunik egon».
Horregatik, «arduragabekeria politikoaz jardutea eta gaiaren erabilera politikoa egitea» egotzi dio oposizioari, «Bizikidetza Mahaiaren filosofia puskatu duena EAJren mozioa Plenora eramatea» izan delako. «416 biktima daude herri honetan, eta erronka da horien errekonozimendurako zer egin adostea. Aranzadik esan bezala, sufrimenduak ezin dira mailakatu». Horregatik dio Gobernu Taldeak «errekonozimendu ekintza integral eta inklusiboak behar» direla. «ETAren biktimak errekonozitzeko arazorik ez dugu. Nola egin adostu behar da». Lanean segitzeko «borondatea» ere agertu dute, beti ere, «adostasunean oinarrituta».