Lau partidu geratzen zaizkio Hernaniko errugbiko Ohorezko Mailako taldeari, Liga bukatzeko. Lau partidu, eta, beraz, hil ala biziko lau erronka. Lau horietan aurrenekoa izango da bihar eguerdiko 12:00etan Landaren jokatuko duena, Alcobendasen kontra.
Hilabete daramaki Hernanik jokatu gabe, eta «taldea elkartzeko» aprobetxatu dutela azpimarratzen du Beñat Iradi kapitainak. Egindako lana bihar nabaritzen hastea espero du. «Ea etxean jokatutakoarekin ondo hasten garen!».
«Saltsa emateko» prest Hernani, Liga bukatu arte
Sailkapeneko hamargarren postuan dago Hernani, 29 punturekin. Atzetik, La Vila eta Gernika bakarrik dauzka, 27 eta 23 punturekin, hurrenez hurren.
Jokatzeko geratzen zaizkion lau partiduak, berriz, ez dira, inondik inora ere, errazak. Bihar Alcobendas izango du aurkari; hirugarrena da sailkapenean, 68 punturekin. Hurrengo partiduak Independiente, Ordizia eta El Salvadorren kontrakoak izango ditu; 38 punturekin 8garren, 52 punturekin 4garren, eta 72 punturekin bigarren daudenen kontrakoak, hain zuzen.
Hori ikusita, Iradi kapitainak onartzen du «urte guztia lau partidutan erabakiko» dela. «Aurten ere saltsa emateko prest gaude. Zorionez edo zoritxarrez, gu eta afizioa ohituta gaude azkenera arte zalantza horretan ibiltzera». Azkeneko postua saihesteko aukerarik ez dutela falta uste du, sei puntuko aldea ateratzen baitiote Gernikari. Play offik jokatu gabe libratzea, ordea, zailagoa izango da.
«Aurreko bi partiduek asko markatu gaituzte»
Gauzak horrela, geratzen diren lau partiduetatik bat, behintzat, irabazi beharra daukate, eta biharkoa izatea espero dute. Dena den, azken hil honetan majo lan egin dutela onartzen du kapitainak, eta hor egon daiteke salbaziorako giltza. «Aurreko bi partiduek asko markatu gaituzte. Ondo hasi ginen, baina bigarren zatian alde egin ziguten partiduek. Hor ikusi zen ez garela guztiz bat eginda ibili, eta hori egin dugu azken hil honetan; taldea elkartu, pilak jarri».
Hilabete da azken partidua jokatu zutela, eta, egindako lanak fruituak ematea espero dute. Bihar Alcobendasen kontra jokatu ondoren, Indenpendienteren zelaia bisitatu beharko dute hurrena, eta Ordizia izango dute azken aurreko aurkari, etxean. «Ez da izaten aukera haundirik ezer oparitzeko, eta Ordiziarekin haundia da pikea. Baina agian, Ordizia izan daiteke eskuragarrien daukaguna, ezer jokatzen ez badu. Azken partidua Salvadorren kontrakoa da, eta Liga irabazteko aukera haundia dauka!».
Dena airean dagoela argi utzi du, hala ere. «Ematen du azkenetan gaudela, baina urteroko borrokan gaude. Oraindik errugbi asko dago jokatzeko, eta guk horretarako gogoa daukagu!».