Sagardoaren Txapelketaren bigarren jardunaldia gaur amaituko da Galarretan B multzoko partiduarekin. Bertan, Ezkurra II eta Garces, Ansa eta Agirrezabalaren aurka neurtuko dira. Gorriek Gurutzeta ordezkatzen dute eta urdinek Setien. Ansa eta Agirrezabalak lau puntu dituzte sailkapenean eta Ezkurra II eta Garcesek bi. Kontuan izanda taldeko beste bi bikoteek sei eta lau puntu dituztela, esan daiteke azken jardunaldira arte ez dela erabakiko ezer ere ez multzo honetan.
Hori bai, Gurutzetak ezin du galdu zero eta puntu negatiboarekin. Horrela gertatzen bada, hau da, 32 tanto baino gutxiago egiten badituzte, ia ezinezko izango dute sailkatzea.
Aukera errealak izateko puntua gutxienez batu behar dute. Hala ere, ez dute erraza izango, parean Setienen bikote sendoa izango baitute. Lehenengo jardunaldian oreka erakutsi zuten eta ahulgune gutxi dituen bikotea da, bakoitzak bere maila erakutsiz gero.
Garaipena urdinena, hau da, Setienena baldin bada, hanka eta erdi finalerdietako ligaxkan edukiko lukete zortzi punturekin. Beraz, gorrientzako partidu erabakiorragoa da gaurkoa.