Kontzertu berezia izango da gaur, Biterin. Harian emanaldia eskainiko dute, elkarrekin, Eñaut Elorrieta abeslariak eta Kaabestri String Ensemble taldeak, harizko instrumentuak jotzen dituen boskoteak. Iluntzeko 20:00etan izango da, eta bertan egon nahi duenak, aukera dauka oraindik, azkeneko sarrerak erosteko; Biterin bertan, 7,5 euroan.
«Klasikoa bezain berritzailea» da ikuskizuna, aurreratu dutenez: «erronka kantariarentzat, bere ondoan gauden guztiontzat, eta baita publikoarentzat ere». Elorrietak jarriko du ahotsa, Oscar Lopezek eta Igor Torrek biolin doinuak, Arkaitz Martinezek biola, Jon Larrazek txeloa, eta Paloma Torradok kontrabaxua. Jolasean ariko dira hariak eta ahotsa, «dotoreziaz eta zehaztasunez zipriztindutako notak, eta Eñauten ahotsa sendo, libre eta zabal».
'Lur' antzezlana, larunbatean
Hurrengo zita, haurrentzako antzerkiarekin izango dute, Biteriko areto nagusian. Izan ere, Lur antzezlana eskainiko du Xake Produkzioak konpainiak, larunbatean, eguerdiko 12:00etan. 7 urtetik gorakoentzat da, eta sarrerak salgai daude, Biterin bertan.
Ane bilobari, berarentzat propio egindako panpina oparituko dio Julianek, eta bidaia zirraragarria hasiko dute hirurek. Baina abentura irudimentsua dirudienak lagunduko du berbideratzen Aneren eta Jon aitaren arteko harremana. Onarpen arazo bat dauka Jonek. Izan ere, Ane mutila da.