Gaur daukate bigarren zita berezia, Oroimen Historikoari buruzko jardunaldiek, Biterin. Hitzaldia eskainiko du bertan, arratsaldeko 19:30etan hasita, Josu Chueca historialariak. Biharko zegoen aurreikusita, baina egun bat aurreratu dute.
Gerra garaiko erbesteratzeei eta Europako kontzentrazio eremuei buruz ariko da Chueca, gaurkoan: Alanbre-hesiak berriak zirenean; erbesteratzeak eta Europako kontzentrazio eremuak gerra arteko Europan. Zehazki, landuko du Espainiako Gerra Zibilaren hasierak eragindako erbesteratzeen gaia, euskal herritar askok utzi behar izan baitzuten etxea. Haien bizipenak izango ditu hizpide.
Historia Garaikidean doktorea da Josu Chueca, Euskal Herriko Unibertsitatean; eta irakaslea ere bada, EHUn bertan. Makina bat liburu eta idazlan argitaratu ditu, historiaren gai ezberdinei buruzkoak: Lau Haizetara, Gerra Zibilaren ondorengo erbesteaz; Gurs, el campo vasco; Espainiako Gerra Zibila Euskal Herrian...
Oroimen Bulegoa zabalik, datorren astean ere
Jardunaldiak datorren astean bukatuko dira, zabalik egongo baita Oroimen Bulegoa, astelehen eta asteartean, goizeko 10:00etatik 14:00etara eta arratsaldeko 16:00etatik 19:00etara, udaletxean. Bertan, eskatu daiteke informazioa, 1936 eta 1945 urteen artean errepresaliak jasan zituzten senideen inguruan; baita informazioa eman ere. Bertara joaterik ez duenak, 943 46 61 42 telefonora deitu dezake, edo idatzi amaiarodriguez@aranzadi.eus helbidera.