Bete-betean dago sartuta denboraldi berrian, Denontzat taldea. Otsailean hasi zituzten obstakulo probak, eta hasi berritan, dagoeneko emaitza bikainak lortu dituzte, taldeka zein bakarka.
Gijonen izan zuten estreinakoa, Farinato Race lasterketen zirkuitukoa; eta Denontzat taldeko 42 kidek hartu zuten parte. Lokatza eta hotza izan zituzten kontrario, zailtasun nabarmena zeukaten obstakuloak gainditzeko, baina lasterketa bikaina osatu zuten, eta taldekako garaipena lortu zuen Denontzatek. Gainera, bakarka ere emaitza haundiak eskuratu zituzten: irabazi egin zuen Irati Beorlegi hendaiarrak, proba osatu zuen emakume bakarrak; eta bigarren izan zen Asier Landart irundarra.
Hiru hernaniar podiumean, Rincon de Sotoko proban
Emaitza bikainak lortu bazituzten estreinakoan, ez ziren kaxkarragoak izan Rincon de Sotoko Unbroken Race lasterketan, martxoaren 2an. Taldeko 45 kidek hartu zuten parte, eta Joxe Mari Peso eta Landart bigarren eta hirugarren izatearekin batera, podiumera igo ziren hiru hernaniar, adinaren araberako sailkapenetan: Ekain Nogueirak irabazi egin zuen 18-24 urtekoetan, eta bigarren izan zen Ania Arregi, kategoria berean; eta Ismael Mateo ere bigarren izan zen, 45-49 urtekoen kategorian.
Eta Mallorcako Spartan Race izan zuten hurrengoa, martxoaren 9an. Taldeko zazpi kide aritu ziren, proba gogorrean: aldapa haundiak, obstakulo zailak eta indar haundia eskatzen zuen lana. Ismael Mateok lortu zuen emaitza nabarmenena, 45-49 urtekoen artean podiuma eskuratuta; eta horrekin batera, Europako Spartan Txapelketara txartela, ekainaren 29an Italiako Dolomitetan jokatuko dena.
Aurten, hiru zirkuitu ezberdinetako probak jokatuko dituzte Denontzat taldekoek: OCRA Ligakoak eta Farinato Racekoak, OCR Europako eta Munduko Txapelketetara sailkatzeko aukerarekin; eta Spartan Racekoak, bere Europako eta Munduko Txapelketa propioekin. Zirkuituetatik kanpoko probak ere egingo dituzte.