Atzo eguerdian eman zuen abisua Udaltzaingoak: bi bidoi agertu ziren Hernanitik Ereñotzurako norantzan, Fagollaga pasa eta erreka gaineko hurrengo atsedenlekuan. «Potentzialki arriskutsuak» izan zitezkeela ondorioztatu zuten, «isuri kimikoa zutelako».
Arratsaldean bertaratu zen hondakin arriskutsuetan aditua den enpresa, bidoiak erretiratzera.
Segurtasun protokoloa, hondakin arriskutsuen aurrean
Eguerdi partean jakinarazi zuten errepidea itxiko zutela bi noranzkoetan, egoera aztertzeko. Bertara gerturatu ziren udaltzaingoa, ertzaintza eta Donostiako suhiltzaileak, eta «hondakin potentzialki arriskutsuak izan zitezkeelakoan», segurtasun protokoloa jarri zuen martxan Udalak. Horrela, GI-3410 errepidea itxita egon zen, «inspekzioa egin bitartean eta segurtasuna bermatzeko asmoz».
Azterketa eginda, berriro ere ireki egin zuten errepidea, nahiz eta bidoia agertutako ingurua itxita mantendu, bidoiak erretiratu arte. «Bidoiak mugitzeak arriskua ekar zezakeela iritzita, hondakin arriskutsuetan aditua den enpresa bat arduratuko da bidoiak erretiratzeaz suhiltzaileekin elkarlanean», jakinarazi zuen Udalak. Arratsaldean egin zituzten lanak, «Udaltzaingoa eta Ertzaintza eremu horren zaintzaz arduratu» bitartean.
Dagoeneko kendu dituzte bidoiak bertatik.