Aurreneko aldiz antolatu du Eusko Jaurlaritzak Asteklima, Euskadiko Klima-aldaketaren lehenengo astea. Helburua da «mundu mailako arazo honek toki mailan ere eraginak sortzen dituela ohartaraztea». Eta lan horrekin bat egin du Astigarragako Udalak ere. Atzo aurkeztu zuten Zorione Etxezarraga alkateak eta Izaskun Txintxurreta ingurumen teknikariak.
Aste honen bueltan, bi jarduera antolatu dituzte «kontzientziazioa helburu, eta terminoak argitze aldera», azaldu zuen alkateak berak.
Erakusketa, Izadi21 enpresaren eskutik
Erakusketa izango da jarduera horietako bat; Izadi21 enpresaren eskutik, klima-aldaketaren gaiaren bueltan gehiago jakiteko aukera izango da. Gaur hasi eta ostegunera bitarte bisitatu ahal izango da goiz eta arratsaldez (09:00-13:00 eta 15:00-20:30), kultur etxean.
Hainbat panelek osatzen dute, eta hiru atal nagusi ditu: aurreneko zatian klima-aldaketak mundu mailan eta EAEn dituen eraginak azaltzen dira; bigarrenean, klima-aldaketaren eragile nagusiak argitzen da; eta hirugarrenean, irtenbideak eskaintzen dira.
Mahai-ingurua, bihar
Eztabaidan eta solasean ere izango da aukera klima-aldaketaren gaian sakontzeko. Horretarako, mahai-ingurua egingo dute bihar, hiru adituren artean: Arturo Elosegi EHUko katedraduna; Jakoba Errekondo ingeniari agronomoa eta paisajista; eta Xabier Esteban ingurumen eta energia arloko teknikaria. Arratsaldeko 18:30etan hasita izango da, kultur etxean.