Hernaniko Musika Eskola Publikoko txistulari taldeak kontzertua eskainiko du, gaur, 12:30etan hasita udaletxeko arkupeetan. Urtero egiten den kontzertua da eta oso estimatua hernaniarren artean.
Gainera, aurten berrikuntza garrantzitsu batekin dator, izen berria estreinatuko dute eta lehenengo aldia da kontzertu honetan, publikoki, Leokadisti Txistulari Taldea izenarekin joko dutela txistua.
«Taldeari izena jarri behar, eta nola ez gogoratu Leokadisti etxearekin? Hernaniri hainbeste txistulari on eman dizkion etxearekin, gainera guk astero entsaiatzen dugunetik hain metro gutxira egonda? Ansorenatarren jaiotetxearen izena hartu dugu, bai, XIX. mendetik gaur arte txistua Euskal Herri osora zabaldu duen etxearena», azaldu dute.
Betiko doinuei Eskozia eta Irlandakoak gehitu dituzte
Hamahiru piezako errepertorioa eskainiko dute, eta ohiko moduan, joko dituzte txistularien errepertorioko doinu klasikoak, batetik; dantza doinuak, bestetik; eta azkenik, beste errepertorio batzuetatik hartutako bitxikeriaren bat.
Oraingoan, Eskozia eta Irlandako doinu bana aukeratu dute gaurko kontzerturako: Cumberland Reel eskoziarra, eta The 17th of July irlandarra.