Nonahi ikusi zitekeen atzokoan, kolore morea; eta bereziki, Urumea bailaran antolatutako ekintzetan, herriz herri, Martxoaren 8a ikur hartu eta berdintasunaren alde oihu egiteko elkartuta. Greba Feminista zegoen deituta, eta lanak utzita, kaleak hartu zituzten emakume askok eta asko. Bizitzak erdigunean jarri zituzten, eta planto egin nahi izan zioten heteropatriarkatu kapitalistari.
Eguerdian, jendetza bildu zen Hernaniko Zerbitzu Sozialen aurrean, zaintzaile eta pentsiodunak erdigunean jartzeko asmoz deitu zuten kontzentrazioan. Udaletxe aurrean egin zuten kontzentrazioa, Astigarragako udal langile eta zinegotziek, ordu berean. Eta Aranoko emakume talde bat, Donostiara mugitu zen, elkarrekin, bertako elkarretaratzera.
Arratsaldean izan ziren zita gehiago, bailaran: etxeko langileei aitortza ekitaldia eta dantza saioa egin zituzten Hernanin; elkarretaratzea egin zuten Goizuetako Plazan; eta mikromatxismoen inguruko solasaldian murgildu ziren Aranoko Maisuenean. Manifestazio jendetsuak borobildu zuen eguna, Hernaniko Kaxkoan.