Hondakinen kudeaketa jasangarri eta arduratsuarekin konpromisoa daukan elkartea da Hobeki, eta Hernaniko Udala da elkarteko sortzaile eta kideetako bat, Usurbil, Leintz Gatzaga, Larrabetzu, Donemiliaga, Berastegi, Segura, Berriatua eta Zaldibiakoarekin batera.
Euskal Herriko hondakinen kudeaketaren inguruko azterketa egin berri du.
Zailtasunak, datuak biltzeko
Azterketa egiteko zailtasunak izan dituela azaldu du Hobekik, Euskal Herrian ez dituztelako toki guztietan irizpide berdinak hartzen kontuan, datuak jasotzeko. Era berean, hondakinen kudeaketarekin lotutako planak ere oso desberdinak direla diote.
«Araban eta Gipuzkoan, esaterako, Europako Zuzentaraua betetzeko planak tramitatzen ari dira, baina zenbait kasutan zehztasun haundirik gabe. Bizkaiak indarrean duen plana, berriz, plan zaharkitu baten luzapena da, eta Europako helburuetara egokitzeko berritu beharra» dute. Ipar Euskal Herriko daturik ezin izan dute bildu, Akitaniako datuak bakarrik jasotzen direlako.
Europako helburuak, urruti
Ondorio nabarmenenak izan dira, batetik, «Euskal Herrian hondakinak kudeatzeko eredu bateraturik ez» dagoela, eta bestetik, «erakundeak indar guztiak errefusa tratatzeko teknologia hobetzeko ahaleginean jartzen» ari direla, «eta ez errefusa kiloak murrizten».
Horregatik, gogorarazi dute 2035erako hiri hondakinen gehienezko isurketa %10era murriztea dela Europaren helburua, eta 2020rako hiri hondakinen %50 birziklatu edota berrerabili behar dela, 2035erako %65era iristeko. «Egun, Euskal Herriko herria batek ere ez du betetzen Europako Zuzentaraua». Organikoa hiri hondakinen %40 dela ere azpimarratu dute, eta Gipuzkoan eta Nafarroan bakarrik jarri dela arreta horretan. «Araban eta Bizkaian kudeatzen den bio-hondakin kopurua, hurrenez hurren da, 6,36 eta 5,76kg/pertsonako eta urteko. Gipuzkoan, 65,56 eta Hernanin 110, atez atekoaren bidez».