Martxoko agenda hitzordu literarioz beteta dago; ohikoak batzuk, haurrei zuzendutako ipuin kontaketak edota helduentzako literatura solasaldiak, esaterako, edota bereziagoak bete batzuk, egile eta sortzaileekin batera egingo direnak.
Musikari, idazle eta ilustratzaileak
Zita berezietako bat martxoaren 12ko literatura solasaldia izango da. Ohi bezala Ane Mayozek gidatuko du, kasu honetan, Nola heldu naiz ni honaino liburuari buruzko saioa, 19:30etan, baina egilea, Kattalin Miner hernaniarra, bertan izango da.
Bestalde, hilaren 14an Maite Larburu musikari hernaniarrarekin Irakurketa Partekatu saioa egingo da 19:30etan, eta Ion Olano itzultzaile hernaniarrak ere hartuko du parte. Eskura daude musikariak saio honetarako aukeratutako liburuak, maileguan hartu eta irakurri nahi izanez gero.
Hurrengo hitzordua, martxoaren 26koa da: komikiei buruzko solasaldia egingo da aurrenekoz, 20:00etan, eta Miguel Marmolen hamaika eta bat jaiotzak lana ezagutu ahal izango da, Alai Zubimendi ilustratzaile hernaniarrak gidatutako saioan, eta Dani Fano komikiaren egilearekin. Komiki hau ere liburutegian irakurri daiteke.
Ipuin kontaketak eta solasaldiak ere bai
Ohiko hitzorduen artean, hilaren 12an ipuinak kontatuko ditu Pello Añorgak, 17:30 eta 18:00etan, 3-4 eta 5-7 urtekoentzat, eta 13an, Diario de una buena vecina liburuari buruzko solasaldia izango da.