Bizitzak erdigunean jarri, lan guztiak utzi, eta kaleak hartzeko deia egin dute gaur, Martxoaren 8an. Egun osoko Greba Feminista deitu du Euskal Herriko Mugimendu Feministak, eta planto egitera animatu ditu emakume* guztiak, soldatapeko zein doako lanak egiteari utzita: «Greba Feministak aurre egiten die bizitzako esparru guztiei; indarkeriari, parekidetasun ezari, prekarietateari, sexualitate eredu hegemonikoei, lanen sexuaren araberako banaketari, kontsumo ereduari, familia patriarkalari, jakintzen hierarkizazioari, arrazakeriari, edertasun kanonari eta zapalkuntza guztiei», adierazi dute.
Deialdiarekin bat egin dutela adierazi dute, publikoki, bailarako eragile edo talde ugarik: Hezkuntza Plataformak eta Ereñotzu zein Hernaniko hainbat ikastetxetako ikasle, irakasle eta langileek, AEK euskaltegietako langileek, Hernaniko Sortuk, Hernaniko Udalak eta Udal?Langileen Batzarrak... Hori horrela, zerbitzu gehienetan izango dira gorabeherak, gaur.
Lan guztiak zein ikasgelak uzteaz gainera, ekintza eta mobilizazioetara batzeko deia ere luzatu dute, eta horietako batzuk, bailaran izango dira: Hernanin, egun osoko egitaraua prestatu dute; Astigarragan, kontzentrazioa egingo dute; eta Aranon eta Goizuetan, arratsaldean izango dira ekintzak.
MARTXOAK 8
ARANO
11:00, Donostiako manifestaziora emakume guztiak elkarrekin joateko kedada.
17:30, Arano betaurreko moreekin aztertu, mikromatxismoaren inguruko solasaldia, Maisuenean.
20:30, Emakumeen afari herrikoia elkartean, bakoitzak zerbait eraman eta guztien artean elkarbanatuta.
HERNANI
09:00, Gosaria Iturolan.
10:00, Material prestaketa, Atsegindegin.
12:00, Kontzentrazioa Zerbitzu Sozialetan: zaintzaileak eta pentsiodunak erdigunean.
14:00, Bazkari autogestionatua Atsegindegin: Ekarri zure taperra!
17:00, Etxeko langileei aitortza ekitaldia.
17:30, Ezin badugu dantzatu, hau ez da gure iraultza!, Atsegindegin.
19:00, Manifestazioa, Plaza Berritik.
GOIZUETA
18:00, Elkarretaratzea, Plazan.
21:00, Emakumeen Eguneko afaria, Oxeguardan. Amaia kafetegian eman behar zen izena, aurrez.
ASTIGARRAGA
12:00, 15 minutuko kontzentrazioa, udaletxeko arkupeetan, Udal zinegotziek eta langileek.
Astigarragako Talde Feminista
«Aldarrikatzeko eta lorpenez gozatzeko eguna da gaurkoa»
Inguruko herrietako mobilizazioekin bat egiteko deia luzatu diete, astigartarrei.
Azaldu dute, «nork bere erara» bizi eta ulertzen duela Martxoaren 8a, «helburua partekatzen dugulako, giza eskubideak bermatzea. Eta hori da, gaur egin behar dugun aldarria». Horretarako, inguruko hiri eta herrietan antolatu diren mobilizazioekin bat egin du Talde Feministak, eta parte hartzera deitu ditu herritarrak, «bakoitzak ahal eta uste duenari men eginez eta borroka aurrera eramanez. Iaz, herriko feministok Martxoaren 8aren harira elkartu ginen. Aurten, berriz, elkartu gara gainerako 364 egunetan Astigarraga feminista eta ahalduna osatzeko, formakuntza eta heziketari indarra emanez».