Astearte gauean baso sutea piztu zen berriz ere Goizuetan, duela astebete sua izan zen inguru beretsuan, Burugorrin. Hala ere, atzo arratsaldean itzaltzeko bidean zegoen egindako euriari esker. Ongi etorria izan zen ura. Aurretik, zailtasunak tarteko, Nafarroako Gobernuak sua itzaltzeko aire bidezko laguntza eskatu zion Espainiako Gobernuari.
23:03an jaso zuten abisua Nafarroako 112 larrialdi zerbitzuan, iragan asteazkenean erretako gunearen parean sua piztu zela ohartaraziz.
Azken orduotako hego haize zakarrak sua itzaltzeko lanak zaildu ditu. Horrez gain, iristeko zaila den eremu batean piztu zen sua. Hori dela eta, airetik itzaltzen saiatzeko deia bidali zen. Eguraldi baldintzek ahalbidetzen dutenean, Nafarroako Gobernuaren bi helikoptero eta Espainiako Gobernuaren hidrohegazkina dabiltza lanean. Suak 300-400 metroko ingurua hartu du.