Hernaniko Udalak eta Goiener Taldeak, Ihoberen babesaz, Fagollagako zentral minihidraulikora bisita antolatu dute iganderako. Bisitaren helburua da zentralaren funtzionamendua lekuan bertan azaltzea. Bide batez, eta adibide hori baliatuta, energia berriztagarriaz hitz egingo dute bertan.
Hernaniko Udalak landu duen Energia Iraunkorrerako Plangintzan helburu nagusi bat jasotzen da: Udalerriko berotegi efektuko gasen (BEG) emisioa %40 murriztea 2030erako (2010eko datuekin alderatuta).
Energia Plangintzaren garapenean, %40ko murrizketa hori lortzeko 85 ekintza proposatzen dira. Neurri horiek 2017 eta 2030 bitartean ezarriko dira. Neurri horien artean jasotzen da herritarrei gerturatzea energia berriztagarrietan oinarritutako aukerak.
Mattin Aldaia Ingurumen zinegotziaren esanetan, «Fagollagako ateak herritarrei zabaltzea aukera bikaina da inguruko baliabide naturalak nola erabiltzen diren ikusteko, kontzientzia sortzeko eta eztabaida energetikoa herrira gerturatzeko».
Minihidraulika zentrala Goiener Taldearen esku dago egun, joan zen udan ekarpen kolektiboen bidez erosi ondoren. Igandeko bisita Hernaniko Udalarekin batera antolatu dute. Pozik agertu dira Goiener Taldeko ordezkariak, «etorkizun jasangarriago bat izateko beharrezkoa baita gizarteko agente ezberdinak elkarlanean aritzea».
Euskadiko Klima Aldaketaren Astea antolatu da lehen aldiz, Asteklima izenburupean eta horren barruan kokatzen da bisita. Fagollagako bisitaren moduko beste hainbat aukera ere izango dira herritarrentzat agendan.
Fagollagara bisitak, izenemateak
Bisitak igandean, bi txandatan antolatu dira: 10:30etan (gaztelaniaz) eta 11:30ean. Fagollagara joateko autobusa Zinkoeneatik eta Ereñotzutik irtengo da. Bisitaren iraupena, joan-etorriak barne, 2 ordukoa izango da. Izen-emateak labur.eus/fagollagabisita web gunean edota 943 25 63 49 / 688 63 79 65 telefonoetan egin daitezke.