EAJ-PNVtik adierazi dute prentsa oharrean Kaxkoko bizilagunek ondoeza adierazi dietela EH Bilduren udal gobernua herriko gune honetan egiten ari den kudeaketaren inguruan. «Zarataren kudeaketa ez da ongi egiten ari. Zenbait bizilagunen esanetan ez dute bakarrik txotx denboraldian sufritzen zarataren arazoa. Urtean zehar garbiketan aritzen diren kamioiak, garbitzaile eta ur pistolen konpresoreak goizeko 06:00etan hasten dira martxan eta bizilagunak esnatzen dituzte».
EAJko bozeramailearen esanetan, «EH Bilduri helarazi nion goizegi hasten zela bide publikoaren garbiketan eta beti normala izan dela lan hauek goizeko 08:00etan hastea. Zergatik jarraitzen da goizeko 06:00etan garbiketa egiten? Ideiarik ere ez dugu».
«Arazoak deskargak egiteko»
Bestetik alderdi jeltzaleak dio «Kaxkoko bizilagunek arazoak dituztela beraien ibilgailuekin sartzeko deskargak egitera. 2015eko legealdian, alkatearekin akordio batera iritsi zen Kaxkoko bizilagunak baimentzen zituena deskargak egitera, abusatzen ez zen bitartean. Kontuan hartu behar da Kaxkoko bizilagunen batazbesteko adina oso altua dela».
Bukatzeko, Amonarraizek EH Bilduri dei egiten dio «hauteskundeen atarian gaudenez ea motibatu eta arazo hauei konponbidea jartzen dien».