Astigarragako Tokiko Gobernu Batzarrak aho batez onartu zuen beharrezkoak diren prozedurak martxan jartzea A.I.U 12 Mendiaundi Aranibar lurzorua erosteko. «Eusko Jaurlaritzak behin eta berriz adierazi du DBH Mendiaundiko partzelan kokatzea ez zaiola egokia iruditzen, eraikina mendi-hegalean altxa behar izango litzatekelako, eta, aldi berean, erdigunetik urruti dagoelako. Gainera, hirigintza lanek asko kaltetuko lukete eremua. Erosketaren helburua Udalak DBHrako partzela bat lehenbailehen edukitzea da» dio udal gobernuak.
Udal taldeak Guraso Elkartearen eskaerari erantzun dio, eta «aukera guztiak suspertuko ditu DBH Astigarragan izateko, ahalik eta epe motzenean».
«Beste kokapen bat bilatzen jarraituko dugu»
DBHko eraikina proiektu estrategikoa da udalarentzat, baina gogoratu behar da «Eusko Jaurlaritzaren eskuduntza dela, eta Hezkuntza sailak ez duela lehentasunezkoa ikusten bigarren hezkuntzako eraikina egitea. Hortaz, lurzorua erosteaz gain, «udal gobernuak lanean jarraitzen du Hezkuntzaren aldetik Astigarragarekiko irizpidea aldatu eta DBHrako eraikina egiteko epeak laburtzeko. Horretarako, udal taldeak beste kokapen alternatibo bat bilatzen jarraituko du, Hezkuntzari erakusteko Astigarragak DBHren alde lanean jarraituko duela, hain zuzen ere herriko errealitateari erantzungo dion proiektu egokienaren alde».