Hasiera batean Pleno lasai xamarra izango zela bazirudien arren, eztabaida piztu egin zen azkeneko puntuetan, hau da, bizikidetzari zegozkionetan.
EAJk aurkeztutako mozio bat izan zen eztabaida ireki zuena, eta aurreneko pausu horri, EH Bilduren «kontramozioak», oposizioak deskribatu zuen bezala, borobildu zuen Plenoa.
ETA eta haren inguruaz, EAJ
ETAk eta haren inguruak eragindako ekintza biolentoak eragindako sufrimendua aitortzeko mozioa izenburupean aurkeztu zuen EAJk testua. Andoni Amonarraiz bozeramaileak azaldu bezala, «testu honen oinarria EAJk 2017an aurkeztutako testu bat da; horri gainontzeko taldeen proposamenak erantsi zaizkio, baina badirudi ez garela adostasun batera iritsi». Haien ustez, «pausoa emateko garaia da, egun erakunde honek bere egin ez dituen sufrimendu batzuk izendatu eta ikusarazteko unea da».
Baina ez zen hala izan, eta EAJ, PSE-EE eta Orain Hernaniren aldeko botoekin, eta EH Bilduren kontrako botoarekin, mozioa ez zen onartua izan.
Botoaren azalpena aurretik eman zuen Luis Intxauspe alkateak EH Bilduren izenean: «Aranzadiren lanaren aurkezpenean denok berretsi genuen landuko dugun memoria integratzailea eta ez baztertzailea izango dela. Halaber, erreparazio ekintzak denon artean adosteko konpromisoa ere hartu genuen. ‘Errekonozimendu integrala, biktima guztiena, inklusiboa’, esan genuen aho batez orduan», azaldu zuen Luis Intxauspe alkateak.
Eta EAJri egotzi zion: «konpromiso hori plazaratu eta hilabete eskas batera aurkeztu duen mozioa ez dator bat Bizikidetza Mahaian adostutakoarekin. Inongo lanketarik gabe, kutxatik atera du 2017tik gordeta zeukan testu bat, eta biktimario bat kontuan hartzen duen erreparazio ekintza bat proposatzen du hauteskundeen atarian».
Hori entzutearekin, hitza eskatu zuen Ricardo Crespo PSE-EEren bozeramaileak: «EH Bilduk badaki urte eta piko daramakiela bueltaka mozio honek».
Ildo beretik aritu zen Jaione Aristregi, Orain Hernaniko bozeramailea: «EH Bilduren udal gobernuak testuaren bukaera oztopatu besterik ez du egin, elkarrekin aurkeztea eragozteko, nahiz eta gainontzeko taldeek akordioetara iristeko nahia irmoa izan».
«2014tik talde politiko guztiak lanean ari gara bizikidetza hobetze aldera [...]», gogorarazi zuen Amonarraizek: «badakigu Plenoaren errekonozimendua iritsiko dela, baina legegintzaldi honetan izatea nahi genuke; batetik, lau taldeek lan haundia egin dugulako bizikidetzaren alde [...], eta bestetik, [...] EH Bildu alkatetzan egonda emango liokeen indarragatik». Eta onartu zuen: «etsituta eta triste gaude».
Hori horrela, oposizioko hiru taldeek Pleno aretoa utzi, eta EH Bilduk bakarrik aurkeztu zuen haiek aurkeztutako mozioa: Biktimen errekonozimendu integratzailea eta ez-baztertzailea adosteko mozioa.
Prezio publikoak orokorrean, gora
Horiek ez ziren gai bakarrak izan, ordea. 2018-2019 ikasturteko Prezio Publikoen eta Tasen Ordenantza Fiskala aldatzeko proposamena egin zuen udal gobernuak: «orokorrean %1a igotzea proposatzen dugu», azaldu zuen Isa Sanchez zinegotziak. EH Bilduren aldeko botoekin onartu zuten. Aho batez onartu zuten, ordea: udal eraikinen garbiketa zerbitzua lagatzeko kontratua, udal etxebizitzak alokairuan emateko oinarriak, SEADen 43.urteurrenari buruzko erakunde adierazpena eta Martxoaren 8ko grebaren inguruko mozioa.