Sutea piztu zen atzo goizaldean, Goizuetan. Herritik 3,5 kilometrora gertatu zen ezbeharra, Burugorriko bidean. Goizeko 04:37etan jaso zuten mezua Goizuetako suhiltzaile boluntarioek, eta lanean pasa zuten egun osoa.
Haiekin batera izan ziren Cordovillako beste 10 suhiltzaile. Denera, lau kamioi eta zisterna bat gerturatu ziren bertara, baita bi helikoptero ere, eta Madriletik etorritako hidrohegazkina, zonalde zailenetara errazago iristeko.
Atzo iluntzerako, «kontrolatu xamar» zegoen sutea, Goizuetako suhiltzaileek azaldutakoaren arabera. Hori bai, bi artzai borda erre ziren, eta lur hektarea asko; 100 baino gehiago, dirudienez. Era berean, nabarmendu eta eskertu zuten, laguntzera hurbildutako herritar guztien jarrera.