Aurreko asteleheneko zerbitzu publikoen batzordean onartu zituen Udalak diesel garbigailu bat erosteko baldintzak, EH Bilduren aldeko botoekin. PSE-EEko ordezkaritza abstenitu egin zen: «asmoa zen informazioa biltzea garbigailu elektrikoaren alde egin duten lekuen esperientzien inguruan».
Eta halaxe egin dutela adierazi dute prentsa-ohar bidez: «Hernaniko alderdi sozialista Irun-Hondarribia zonaldeko arduradunekin jarri zen harremanetan, duela hilabete batzuk bi garbigailu elektriko erosi baitzituzten».
«Bidasoaldean oraingoz ez dirudi arazorik izan dutenik»
Ricardo Crespok PSE-EEren bozeramaileak argitu du, baita ere, Hernaniko PSE-EE ez dagoela ados «diesel garbigailu bat erostearekin». Eta dio: «energetikoki eraginkorrak diren ibilgailuen alde egiteko unea da». Gainera, gogorarazi du: «duela gutxi Eusko Jaurlaritzak onartutako Energia Eraginkortasunerako Legeak erakundeei derrigortzen die 2020tik aurrera erregai alternatiboak erabiltzen dituzten ibilgailuak erosi ditzaten».
«Alderdi sozialista Irun-Hondarribiako arduradunekin jarri zen harremanetan, duela hilabete batzuk bi garbigailu elektriko erosi baitzituzten»
Horrez gain, garbigailu elektrikoen abantailen inguruan ere aritu da Crespo: «abantaila nabarmenak ditu, hala nola erregai fosilik ez dagoela, eta horrek dakarren kutsadura txikiagoa dela; zarata gutxiago egiten duela lanean ari denean eta mantenu kostua merkeagoa dela». Era berean, desabantailak ere badituela onartzen du: «baliteke haren potentzia eta beraz, eraginkortasuna nahikoak ez izatea». Dena den, diotenez, «Bidasoaldean oraingoz ez dirudi arazorik izan dutenik».
«EH Bildu kudeatzen hasi da udal hauteskundeak gertu daudela ikustean»
Bide batez, Hernaniko PSE-EEk lau urte hauetako, hau da, legegintzaldi honetako «kudeaketa urri–an» jarri du begirada: «erosi beharreko garbigailua, dagoeneko jasota zegoen 2017ko aurrekontuetan, baina orain arte ez dira erosteaz gogoratu».
Eta kritikarekin jarraitzen dute: «EH Bildu Udala kudeatzen hasi da udal hauteskundeak gertu daudela ikustean».