Pasa den otsailaren 15ean inauguratu zuen erakusketa Tere Avilak. Ordutik, hernaniar asko eta asko pasa dira bertatik: «harrituta geratu naiz; ez nago ohituta hain laudatua izaten!».
Denera 66 lan jarri ditu Biterin: «gehiengoari harritu dio teknika aldetik oso desberdinak direla haien artean». Eta hala da: 25 bat lan dira ‘collage’ teknikarekin eginak; akrilikoekin eginak dira bi; eta gainontzekoa, aldiz, oleoak eta akuarelakoak dira. Bihar arte ikusi ahal izango dira.
‘Collage’ak, berrienak
Bereziki harrituta gelditu dira bisitariak ‘collage’-ekin. Horiek dira Avilaren lan berrienak, duela 4-5 urte hasi baitzituen: «bilobek ondo pasatzeko modu bezala sortu zen; eskulanak asko gustatzen zitzaizkien, eta kontxak margotzen aritzen ginen». Eta horrela buruan zituen ideiei forma eman zien, beti ere oinarri bezala «hondartzetatik hartutako kontxak, kristalak, harriak...» izanik. Erabili aurretik, ordea, «sakonki garbitu, lehortu eta sailkatzen ditut».
Aurreneko erakusketa
Oso eskertua dago bertaratu den jendearekin, baita lagun batekin ere: «aurreneko aldia da erakusketa jartzen dudana, inoiz ez zitzaidan burutik pasa. Horregatik, Anttoni eskerrak eman behar dizkiot, bultzada eman baitzidan horretarako. Baita sorpresa ere: berak apuntatu zidan, eta [Biteritik] deitu zidatenean sorpresa eman nuen!».
Dena den, ez da damutzen: «indar asko eman dit esperientzia honek!». Eta ez du baztertzen etorkizunean bueltatuko denik: «agian animatuko naiz, baina ez daukat presarik», onartzen du Avilak.