Bizikleta gainean mota guztietako oztopoak gainditzen daukaten abilezia erakutsiko dute bihar Hernanin, Gipuzkoako Trialsin txapelketan parte hartuko duten lehiakideek.
Biharkoak txapelketako aurreneko probak izango dira, eta 10:30etan hasiko dira, kiroldegiaren ondoan. Horrela, orain arte Fagollagan egiten zen proba herritarrei gerturatu nahi izan zaie. Parte-hartzaileen artean Irene Caminos, Benito Ros eta Ion Areitio bezalako espezialistak ikusi ahal izango dira. Horrez gain, herritarrek ere probatu ahal izango dute kirol hau; bertan utziko zaizkie bizikletak eta kaskoak.
Hurrengo probak Tolosan eta Aretxabaletan egingo dira, martxoaren 31 eta maiatzaren 19an.