Beste modu batera ‘txotx’ egiteko aukera eskainiko du, hamalaugarrenez, Sagar Lasterrak, CD Hernani atletismo sailaren eskutik. Sagar Lasterrak. Gaur izango da lasterketaren hamabigarren edizioa; Hernani Arraun Elkartearen egoitzatik, Ibarluze poligonotik abiatuko da, goizeko 11:00etan.
Sagardotegietatik, 8,9 km.
Urtero bezala, sagardotegietatik egingo dute korrika, lasterkariek; besteak beste, Goiko-Lastola, Elorrabi, Iparragirre, Altzueta, Olaizola, Otsua-enea eta Itsasburu zeharkatuko dituzte, Hernanira iritsi arte. Hain zuzen, Ave Maria parkean emango zaio bukaera, eguerdi aldera.
Ibarluze poligonotik abiatuko dira lasterkariak, eta bertara joateko, doako autobusa jarriko dute. Bi aukera izango dira, 10:10etan abiatuko da aurrenekoa, eta 10:30etan, bigarrena, biak, Kiroldegitik.
Ondoren, eguerdi aldera egingo dute sari-banaketa Ave Maria parkean. Lau kategoriatan izango dira sariak: maila absolutuan gizon eta emakumeak; eta beteranoen mailan, gizon eta emakumeak. Gainera, opariak ere zozketatuko dituzte, partehartzaile guztien artean.
Dorsalak eta izenemateak, Kiroldegian
Horren aurretik, azkeneko izenematea osatzeko aukera izango dute korrikalariek, goizeko 09:00etatik 10:30ak bitarte, eta ordu berean jasoko dira dorsalak eta txipak, baita kontsigna zerbitzua ere. Korrika eta txotxa ere uztartu daitezkeela erakutsiko dute!