bilerarako deia egin zion Udalak aurreko astean Herri Eskolako komunitateari, hari dagozkion gaien nondik-norakoak azaltzeko. Alkatetzak prentsa-ohar bidez jakinarazi duenez, «legegintzaldi honetan martxan jarri diren» hiru proiektu landu zituzten, bereziki: jangelaren haundipena, eraikin berria eta etorkizuneko DBHrako orubea eskuratzea.
Beste ekintza batzuen menpe, eraikin berria
Zorione Etxezarraga alkateak azaldu zuenez, «Herri Eskolako eraikin berriaren obra atzeratzea Arrobitxulon egin behar diren beste hainbat ekintzen menpe dagoela da: batetik, ezpondaren egonkortzea eta auzoa herriko oinarrizko zerbitzuekin (Herri Eskola, kiroldegia eta udaletxea) lotuko duen igogailua egitea; eta bestetik, Herri Eskolako eraikin berria kokatzeko Plan Orokorrean egin beharreko aldaketa puntuala egitea».
Jangelaren kasuan, «txikienen espazioari 100 plaza gehituko dizkion haundipen obra geldituta dago Herri Eskolako Obren Batzordeak eskatuta. Batzorde honek ez du Udalaren proiektua bere egiten, matrikulazioen garapenaren azterketa bat egiten den arte, ziurtatzen duena haundipena nahikoa dela», azaldu dute.
Plan Estrategikoa, Herri Eskolaren zerbitzura
Udal gobernuaren ustetan, Guraso Elkarteak jangelaren haundipena beste lan batzuekin lotzen dute «azterketa sakonagoa behar dutena, eta horrek, jangelak behar duen haundipena atzeratuko du». Batzorde horrek eskatuta, Udal gobernuak hitza eman du «Herri Eskolaren zerbitzura» jarriko duela «udal aurrekontuak aurreikusten duen Hezkuntzako Plan Estrategikoa».
Horrez gain, Udal gobernuak iragarri du Herri Eskolaren zuzendaritzarekin bilera deituko duela indarrak batzeko.