Aste batzuk lasterketarik gabe eman ondoren, errepideko denboraldiari emango diote hasiera asteburu honetan txirrindulari batzuek.
Horiek dira, hain zuzen, 23 urte azpiko txirrindulariak; Zumaian izango dute aurreneko zita gaur. Bertan, Euskaldun Txapelketari dagokion Zumaiako XI. Saria jokatuko dute. 112 kilometroko ibilbidea osatuko dute, portu puntuatzailerik gabe, beraz, helmuga sprintean bizitzeko aukera izango da.
Saio bikoitza, juniorrek
Bi saio izango dituzte junior mailakoek. Tafallako belodromoan izango dira gaur, Euskadiko Pista Txapelketan; eta bihar, aldiz, errepidera aterako dira: Udaberri Memoriala izango dute, Eibarren.