Ate joka daude inauteriak, Goizuetan ere bai! Datorren igandean hasiko dira, martxoaren 3an, eta asteartera arte izanen da festa; eta hurrengo larunbatean, martxoaren 9an, Kontuen Eguna izanen da.
Gaztetxoen Zahagi Dantzarekin hasiko da festa, igande arratsaldean, berehala inauteri giroa pizteko. Gero, dantzaldia izanen da, Ostolaza eta Narbaizarekin, eta mozorroen afaria gero. Elkarrekin eginen dituzten otordu askoren aurrenekoa izanen da hori!
Astelehenean aterako da inauterietako konpartsa, herrian barrena, aurten bikingoen festarekin. Mozorroen irteera baserritara goizean goiz eginen dute. Ondoren, plaza apainketa eta hamaiketakoa eta gero aterako da konpartsa. 13:30etan umeen bazkaria eginen dute eta 14:00-16:30ak artean umeentzako tailerrak eta zinea antolatu dira. Txokolatada eta trikitilariak arratsaldean ez dira faltako eta mozorroen etorrera dultzaineroekin 19:30etatik aurrera eginen da. 22:00etan hasiko da mozorroen afaria.
Eta asteartean, iritsiko da inauterietako momentu bereziena. Arratsaldean aterako da helduen Zahagi Dantza, Izkiña tabernatik hasita, 17:00etan. Horren aurretik mozorroen gosaria, mozorroak dantzan herriko kaleetan zehar, mozorroen bazkaria egonen dira. Dantzaren ondoren trikitilariek eta afariak jarriko dute festaren amaiera.
Kontuen eguna etorriko da handik lau egunera. Poteoa, bazkaria eta txarangaren doinuak ez dira faltako Goizuetan egun berezi horretan.