Lau edo bost puntu baino gehiago balio ditu gaurko partiduak, Hernanirentzat. Urbietan ariko da, eguerdiko 12:00etan hasita, Gernikaren kontra. Eta ezinbestekoa dute irabaztea trikoloreek, mailari eusteko.
Izan ere, ligako azkeneko sailkatua da Gernika, eta hernaniarrek irabazita, ia behin betiko utziko lukete atzean. Baina galduz gero, konplikatu egingo zaizkie kontuak: azkeneko lauak, oso partidu zailak dituzte trikoloreek. Horregatik da hain garrantzitsua, gaurkoan hutsik ez egitea. 16 partidutik 13 galdu ditu Gernikak, baina aurreko astean La Vilari irabazita, hazita aterako dira. Haien animoak zapuztea izango da, hernaniarren lana.
Zaleen laguntza ere izango du horretarako, Urbietan. Goizeko 10:00etan abiatuko dira autobusean, Biteritik, bultzada ematen laguntzeko. Eta bertara joaten ez direnek, interneten ikusi dezakete partidua, zuzenean: hernanirugby.eus.