Euskadiko Klima Aldaketaren Astea, Asteklima antolatu da aurten aurrenekoz, martxoaren 1etik 10era, eta tartean, Change the Change nazioarteko konferentzia izango da Donostian martxoaren 6rik 8ra bitartean.
Horrekin lotuta, eta «energia berriztagarrietan oinarritutako aukerak herritarrei gerturatzeko» helburuarekin, Fagollagako zentral minihidraulikoa bisitatzeko aukera izango da martxoaren 10ean.
Bisitetan parte hartzeko, izen-ematea
Fagollagako zentrala bisitatzeko bi txanda antolatu dira martxoaren 10erako; 10:30etan aurrenekoa, gaztelaniaz, eta 11:30etan bigarrena, euskeraz. Zinkoenean elkartu eta autobusean joan ahal izango da zentralera, eta buelta ere autobusean egingo da. Bisita osoaren iraupena bi ordukoa izango da.
Batean nahiz bestean parte hartzeko, herritarrek izena eman behar dute aurretik, 943 25 63 49 edo 688 63 79 65 telefono zenbakietan edo labur.eus/fagollagabisita webgunean.
Berotegi efektua murriztuz
Bisita hau Hernaniko Udalak eta Goiener Taldeak antolatu dute, Ihoberen babesarekin. Fagollagako zentrala Goiener Taldeak eskuratu zuen pasa den udaran, eta martxan dauka, hainbat egokitzapen egiten ari bada ere; datorren udara partean automatizaziorako egokitze lanak egitekoak ditu.
Udalak, berriz, Energia Iraunkorrerako Plangintza landu du, eta bertan jaso duen helburu nagusia da «udalerriko berotegi efektuko gasen (BEG) emisioa %40 murriztea 2030erako (2010eko datuekin alderatuta)». Hori lortzeko, 85 ekintza proposatzen dira, 2017 eta 2030 urte bitartean jarriko direnak martxan, eta horietako bat da «herritarrei gerturatzea energia berriztagarrietan oinarritutako aukerak». Hain zuzen, Mattin Aldaia Ingurumen zinegotziaren esanetan, «Fagollagako ateak herritarrei zabaltzea aukera bikaina da inguruko baliabide naturalak nola erabiltzen diren ikusteko, kontzientzia sortzeko eta eztabaida energetikoa herrira gerturatzeko».
Ekimen hauekin guztiekin azpimarratu nahi da «klima aldaketari aurre egiteko norberaren keinu txikien garrantzia».