Zazpi herrialdeetako 440 muslari ariko dira gaur lehian, martxoaren 16an Lizarran jokatuko den Euskal Herriko Mus Txapelketako finalera pasa ahal izateko txartela lortzeko.
Gipuzkoako kanporaketa Zaldibian jokatuko da arratsaldeko 15:00etatik aurrera, eta bertan, Hernaniko bi bikote ariko dira, nor baino nor.
Batetik, Garikoitz Pascual eta Joxemi Ayerbe. Bigarren aldia da parte hartzen dutela, eta bigarren aldia, Hernaniko kanporaketa irabazten dutela. Gaurkoan ondo pasatzea dute helburu, baina saiatuko dira finalera pasatzen.
Bestetik, Iker Zurutuza eta Borja Tejedorrek osatutako bikoteak lortu du gaurko kanporaketarako pasea. Bikote gaztea pozik dago Gipuzkoako finalera iristea lortuta, eta gaurkoan saiatuko badira ere, presiorik gabe ariko dira.