Fagollaga inguruetan ez, Hernaniko herrigunean egingo dute oraingoan, Trialsin Txapelketa. Gaur izango da, goizeko 10:30etan hasita, kiroldegiko sarrera nagusiaren aurrean. Plazan prestatu zuten zirkuitu bat atzo, obrako hainbat kontenedorerekin; eta beste bat ondoko jardinetan, zintekin. Karobieta parkearen inguruan ere, prestatuko dute zerbait.
Gipuzkoako Txapelketaren barruan dago proba, eta bertan izango dira Irene Caminos, Ion Areitio eta Benito Ros bezalako espezialistak. Baina haiekin batera, probatzeko aukera izango dute gaztetxoek ere, bizikleta eta kaskoarekin azalduta.