Ostegun gizena atzean utzita, ostiral argalarekin hasiko dira Inauteriak gaur Hernanin, Plazan behera abiatuko den txarangarekin, 15:15etan. Dena den, asteazkeneko Ttapa Ttapa saioan, dagoeneko, mozorro koloretsuekin jantzi zituzten kaleak parte-hartzaileek.
Astigarragan, bestalde, asteburuan ikusiko dira jantzi koloretsu eta alaiak. Baina gaurkoan, Herri Eskolako ikasleek hainbat emanaldi egingo dituzte eskolan; itxiak izango dira emanaldiak. Horrez gain, entsegu orokorra egingo dute gaur 20:00etan, igandean Inude eta Artzainen konpartsan aterako diren dantzari eta musikariek.
Goizuetari dagokionez, berriz, igandera arte itxaron beharko da, festaren eztandarekin gozatzeko.
Musika, antzerkia eta esku pelota, hasteko
Urumeako bailaran Inauteriak ospatzen aurrenekoak aranoarrak izan ziren, pasa den asteburuan. Gaur, berriz, Hernani izango da asteburuko jaiei hasiera emango diena.
Eskoletako haurrek Plazan daukate hitzordua, 15:15etan. Txarangarekin elkartu eta kalejiran ibiliko dira. Hura bukatuta, 17:00etan erraldoi eta buruhaundiak aterako dira, eta 17:30etan haurrentzako ikuskizuna izango da, Plaza Berrin: Sardina Freskue.
Eguna borobiltzeko, Musika Bandaren emanaldia izango da 19:30etan, eta pelota partiduak kiroldegian, 20:00etan. Asteartera arte luztuko da egitaraua, gero.
Opera eta zarzuela doinuak
Musika Bandak 19:30etan joko du, Biterin, eta Inauterietako kontzertu berezi honi Klasiko kuttunak izenburua jarri diote, hainbat opera eta zarzuela ezagunen abesti eta oberturak joko dituztelako.
Besteak beste, Sorozabal, Azkue, Giménez, Chapí eta Bizet konpositoreen obrak joko dituzte.
BIHAR
17:30, Holi Festa eta DJ KI Foru Plazan. Arropa eta oinetako zaharrak eta begiak babestuta eraman.
19:30, Iruñeko Mutil Gazteak txaranga.
MARTXOAK 3
11:30, Inude eta Artizanen konpartsa, Ergobiatik abiatuta. Parte hartzea irekia da. Euria eginez gero, Kontxa Etxeberria plazan, 12:00etatik aurrera.
12:30, Plaza dantza saioa Joseba Barandiaran plazan.