San Balentin egunaren bueltan, lehiaketa bat ez, bi irabazi ditu, Iñigo Legorburu hernaniarrak; biak ere, zita horren inguruan antolatzen diren garrantzitsuenak, Euskal Herrian: Bergarako maitasun gutunen lehiaketa, eta Barakaldokoa.
San Balentin egunean bertan jaso zuen Bergarako saria, Legorburuk, Irizar Jauregian. Ameriketatik izeneko gutuna aurkeztu zuen, Anjelita Kerejetaren eskutik idatzia, Iparragirre bardoaren emazte izanik. Benetako gertaeretan oinarrituta dago, eta gutunean azaltzen du nola Iparragirrek Uruguayn utzi duen, bederatzi seme-alabarekin, Euskal Herrirako bidea hartzeko. Horrela, egiazko abiapuntu batetik, fikzioa garatu du Legorburuk.
500 euroko saria jaso zuen hernaniarrak, eta Jardun Euskara Elkartearen webgunean argitaratu dute gutuna. Guztira, 91 gutun aurkeztu zituzten lehiaketara, eta 266 esaldi.
Emakume errepublikazalea, eta monja zaindaria
Barakaldoko Bihotzaren Hitzak lehiaketan, berriz, 350 euro eta diploma jaso zituen Legorburuk, larunbat arratsaldean, Cruces aretoan. Saturraranetik lanarekin gailendu da, eta gutunean kontatzen du, emakume errepublikazale baten, eta Saturrarango kartzelako monja zaindari baten arteko maitasun istorioa.
Euskerazko 44 gutun aurkeztu zituzten, guztira.