«Hernanin bizi garen guztiak, ohituta gaude entzun eta komentatzen, jasan beharreko usainei eta arnastu behar dugun airearen kalitateari buruz», adierazi du Orain Hernanik. Eta horri buruz, hitzaldi-eztabaida antolatu du gaur, arratsaldeko 18:30etan hasita, Biterin.
Hori horrela, Jose Ramon Becerra eta Jesus Uzkudunen hitzaldia izango da, batetik. Equo Berdeak alderdiko legebiltzarkidea da Becerra, Elkarrekin Podemos taldean; eta lan osasuneko ekintzaile hernaniarra, Uzkudun.
Airearen kalitateari buruzko ikerketa, eztabaidagai
Eta bestetik, eztabaida egingo dute, bertaratuen artean, «herritarren iritziak jasotzeko», Orain Hernanik azaldu duenez: «duela gutxi argitaratu du Hernaniko Udalak, gure herriko airearen kalitatearen inguruko ikerketa. Eta ikerketa honetan oinarrituz, EH Bilduren gobernu taldeak adierazi du, denborarik galdu gabe, Hernaniko biztanleria lasai egon daitekeela, arnasten dugun airea ez baita kaltegarria gure osasunarentzat».
Gaurko saioan, eztabaidatuko dute, «bat datozen ikerketa honetan airearen kalitatearen inguruan emandako datuak, eta gobernu taldeak egin dituen baieztapenak».
Herritar guztiei luzatu diete gonbitea, bertaratzeko.